Equity MF Inflows Drop: માર્ચમાં ઈક્વિટી મ્યુચ્યુઅલ ફંડમાં રોકાણ ઘટીને 11 માસના નીચાં સ્તરે પહોંચ્યું

Equity MF Inflows Drop: વૈશ્વિક બજારોમાં ઉથલપાથલની સાથે સેન્ટીમેન્ટ ડહોળાઈ જતાં અને ઘર આંગણે શેર બજારોમાં અનિશ્ચિતતા વચ્ચે સતત નવા રોકાણમાં સાવચેતીના પરિણામે ઘણા રોકાણકારો રોકાણ પાછું ખેંચવા લાગતાં સેકન્ડરી માર્કેટની જેમ મ્યુચ્યુઅલ ફંડ ઉદ્યોગમાં પણ તેજીના વળતાં પાણી થવા લાગી સંકટના  વાદળો ઘેરાતાં  જોવાઈ રહ્યા છે. માર્ચ ૨૦૨૫ મહિનામાં મ્યુચ્યુઅલ ફંડોમાં ઈક્વિટી ફંડોમાં રોકાણ પ્રવાહ ઘટીને રૂ.૨૫,૦૮૨ કરોડની ૧૧ મહિનાની નીચી સપાટીએ આવી ગયો હોવાનું એસોસીયેશન ઓફ મ્યુચ્યુઅલ ફંડ્સ ઈન ઈન્ડિયા (એમ્ફી)ના આંકડામાં આજે જાહેર કરાયું છે.

માર્ચ ૨૦૨૫ મહિનામાં ઈક્વિટી મ્યુચ્યુઅલ ફંડોમાં નેટ રોકાણ પ્રવાહ ફેબુ્રઆરીની તુલનાએ ૧૪ ટકા ઘટીને રૂ.૨૫,૦૮૨.૦૧ કરોડ નોંધાયો છે. માર્ચમાં બીએસઈ સેન્સેક્સ ૫.૭૭ ટકા અને નિફટી ૫૦ ઈન્ડેક્સ ૬.૩૦ ટકા વધ્યા હતા. ફેબુ્રઆરી ૨૦૨૫માં ૨૬ ટકા ઘટીને રૂ.૨૯,૩૦૩.૩૪ કરોડ નોંધાયો હતો. આ દરમિયાન સિસ્ટેમેટિક ઈન્વેસ્ટમેન્ટ પ્લાન (એસઆઈપી) થકી પણ રોકાણ પ્રવાહ માસિક ધોરણે નજીવો ઘટીને માર્ચમાં રૂ.૨૫,૯૨૬ કરોડની ચાર મહિનાની નીચી સપાટીએ નોંધાયો છે.