બેંગલુરુ, 21 ફેબ્રુઆરી: શુભમન ગિલ આજકાલ વન-ડે ક્રિકેટમાં ‘રન મશીન’ સાબિત થઈ રહ્યો છે અને તેને કોઈ ફરક પડતો નથી કે મેચ ક્યાં રમાઈ રહી છે અથવા વિરોધી ટીમ કોણ છે.
ઇંગ્લેન્ડ સામેની ઘરઆંગણેની શ્રેણીમાં શાનદાર પ્રદર્શન કર્યા પછી, દુબઈમાં ચેમ્પિયન્સ ટ્રોફીમાં બાંગ્લાદેશ સામે ભારતની પહેલી મેચમાં તેની સામેનો પડકાર અલગ હતો. પિચ ધીમી હતી અને બોલરો સતત બેટ્સમેનોમાં ખામીઓ શોધી રહ્યા હતા.
આમ છતાં, ગિલે તેની આઠમી ODI સદી ફટકારી અને ભારતને છ વિકેટથી વિજય અપાવ્યો. તેણે ૧૨૫ બોલમાં પોતાની સદી પૂરી કરી જે તેની સૌથી ધીમી સદી છે પણ કદાચ તેની કારકિર્દીની સૌથી મહત્વપૂર્ણ સદી છે.
વર્ષોથી ભારતીય બેટિંગ લાઇન-અપનો મુખ્ય આધાર રહેલા રોહિત શર્મા અને વિરાટ કોહલીની કારકિર્દીના છેલ્લા તબક્કામાં ગિલનું ફોર્મ ભારતીય ટીમ માટે સારા સંકેત છે. ભારતને પાકિસ્તાન અને ન્યુઝીલેન્ડ સામેની આગામી મેચોમાં પણ તેના જેવા જ પ્રદર્શનની જરૂર પડશે.
તેણે બાંગ્લાદેશ સામે કેટલાક ઉત્તમ સ્ટ્રોક રમ્યા હતા જેમાં ઝડપી બોલર તંજિમ હસનનો પૂલ શોટ પણ સામેલ હતો. તેણે સ્પિનરો અને ઝડપી બોલર મુસ્તફિઝુર રહેમાનને સરળતાથી રમ્યા અને આ સમયગાળા દરમિયાન 52 બોલમાં ફક્ત 30 રન બનાવ્યા, પરંતુ તે સમયે વિકેટ બચાવતી વખતે રમવું વધુ મહત્વનું હતું.
ગિલે પાછળથી યજમાન પ્રસારણકર્તાને કહ્યું, “તે મારી કારકિર્દીની સૌથી સંતોષકારક ઇનિંગ્સમાંની એક હતી. મારે અંત સુધી રમવું પડ્યું અને મેં એ જ કરવાનો પ્રયાસ કર્યો.”
કેપ્ટન રોહિતે એમ પણ કહ્યું, ‘તે છેલ્લા કેટલાક સમયથી શાનદાર બેટિંગ કરી રહ્યો છે અને તેણે બાંગ્લાદેશ સામે પણ આ લય ચાલુ રાખ્યો.’ આમાં આશ્ચર્ય પામવાની જરૂર નથી. તે અંત સુધી ટકી રહ્યો તે જોઈને સારું લાગ્યું.”