નવી દિલ્હી, 16 ફેબ્રુઆરી: નવી દિલ્હી રેલ્વે સ્ટેશન પર થયેલી ભાગદોડની પ્રાથમિક તપાસમાં, પોલીસને જાણવા મળ્યું છે કે મુસાફરો ‘પ્રયાગરાજ એક્સપ્રેસ અને પ્રયાગરાજ સ્પેશિયલ’ વચ્ચે મૂંઝવણમાં પડી ગયા હતા અને તેમને લાગ્યું કે તેઓ તેમની ટ્રેન ચૂકી જશે, તેથી સ્ટેશન પર ભાગદોડ મચી ગઈ. પોલીસ સૂત્રોએ રવિવારે આ માહિતી આપી.
સૂત્રોએ જણાવ્યું હતું કે પ્રાથમિક તપાસ મુજબ, બંને ટ્રેનોના શરૂઆતના નામ ‘પ્રયાગરાજ’ જાહેર કરવામાં આવતા મુસાફરો બે ટ્રેનો વચ્ચે મૂંઝવણમાં મુકાયા હતા.
તેમણે કહ્યું કે સ્ટેશન પર જાહેરાત કરવામાં આવી હતી કે ‘પ્રયાગરાજ સ્પેશિયલ’ પ્લેટફોર્મ 16 પર પહોંચશે, જેના કારણે ટ્રેનની રાહ જોઈ રહેલા લોકોમાં મૂંઝવણ ઊભી થઈ કારણ કે પ્રયાગરાજ એક્સપ્રેસ પહેલાથી જ પ્લેટફોર્મ 14 પર આવી ગઈ હતી.
સૂત્રોએ જણાવ્યું હતું કે પ્લેટફોર્મ ૧૪ પર પહોંચેલા લોકોને લાગ્યું કે તેમની ટ્રેન પ્લેટફોર્મ ૧૬ પર આવી રહી છે અને તેઓ દોડી ગયા, જેના કારણે નાસભાગ મચી ગઈ.
પોલીસ સૂત્રોએ જણાવ્યું હતું કે આ ઉપરાંત, પ્રયાગરાજ જતી ચાર ટ્રેનો ત્યાં પહેલાથી જ હાજર હતી, જેમાંથી ત્રણ મોડી ચાલી રહી હતી અને તેના કારણે ત્યાં અણધારી ભીડ એકઠી થઈ ગઈ હતી.
એક પ્રત્યક્ષદર્શીએ પીટીઆઈને જણાવ્યું હતું કે, “ટ્રેન અને પ્લેટફોર્મનું નામ બદલાવાથી મુસાફરો મૂંઝવણમાં મુકાયા હતા, જેના કારણે આ દુર્ઘટના બની હતી.”
શનિવારે રાત્રે નવી દિલ્હી રેલ્વે સ્ટેશન પર થયેલી ભાગદોડમાં ઓછામાં ઓછા 18 લોકોના મોત થયા હતા અને 12 થી વધુ લોકો ઘાયલ થયા હતા.