સુરતઃ ઘરેલુ ઝઘડાનો દર્દનાક અંતઃ પતિએ પત્નીની હત્યા કરીને ગળેફાંસો ખાઈ લીધો.

બે પુત્ર અને એક પુત્રી અનાથ થયા, પોલીસે ગુનો નોંધ્યો

સુરતના સિંગણપોર વિસ્તારમાં આવેલી ન્યુ ત્રિવેણી સોસાયટીમાં એક હૃદયદ્રાવક ઘટના પ્રકાશમાં આવી છે. જ્યાં પતિએ પત્નીને છરીના ઘા મારીને ગળેફાંસો ખાઈ લીધો હતો. આ ઘટનાથી સમગ્ર વિસ્તારમાં સનસનાટી ફેલાઈ ગઈ છે. મૃતક દંપતીના બે પુત્ર અને એક પુત્રી અનાથ બની ગયા છે.

પોલીસના જણાવ્યા અનુસાર 50 વર્ષીય નરેશભાઈ કુંડલિયા અને તેમની 45 વર્ષીય પત્ની જમનાબેન વચ્ચે અવારનવાર ઘરેલું ઝઘડાઓ થતા હતા. રાત્રે ફરી એકવાર બંને વચ્ચે ઝઘડો થયો હતો, જે બાદ નરેશભાઈએ આવેશમાં આવીને જમનાબેનની હત્યા કરી હતી અને પછી ગળેફાંસો ખાઈ લીધો હતો.

ઘટનાની માહિતી મળતાં જ પોલીસે ઘટનાસ્થળે પહોંચી બંને મૃતદેહોનો કબજો મેળવીને પોસ્ટમોર્ટમ માટે હોસ્પિટલ મોકલી આપ્યો હતો. પોલીસે જણાવ્યું કે મૃતકના બંને પુત્રો કબડ્ડી સ્પર્ધામાં ભાગ લેવા માટે હરિયાણા ગયા હતા.

ડીસીપી પિનાકીન પરમારે જણાવ્યું કે પ્રાથમિક તપાસમાં જાણવા મળ્યું છે કે પતિ-પત્ની વચ્ચે ઘરના કામકાજને લઈને ઝઘડો થયો હતો. જો કે પોલીસ આ મામલે દરેક પાસાઓથી તપાસ કરી રહી છે.