સુરત રેલવે સ્ટેશનને વર્લ્ડ ક્લાસ રેલવે સ્ટેશન બનાવવાની કામગીરી ચાલી રહી છે. જે અંતર્ગત સુરત સ્ટેશન રિડેવલપમેન્ટ ફેઝ-1માં પ્લેટફોર્મ નંબર-4 પર કોન્કોર્સનું કામ કરવામાં આવ્યું છે અને હવે પ્લેટફોર્મ-2 અને 3 પર કોન્કોર્સનું કામ વધારવા માટે આ બંને પ્લેટફોર્મ 60 દિવસ માટે બંધ રાખવામાં આવશે.
આ દિવસો દરમિયાન સુરત રેલવે સ્ટેશનના પ્લેટફોર્મ-1 અને 4 પરથી 164 ટ્રેનો ઉપડશે અને ઉધના સ્ટેશનથી 201 ટ્રેનો ઉપડશે. 350 થી વધુ ટ્રેનોની અવરજવર બદલાશે આ મોટા ફેરફાર માટે રેલવે તંત્ર દ્વારા તૈયારીઓ કરવામાં આવી છે. લોકોને સરળતા રહે તેવી વ્યવસ્થા પણ કરવામાં આવી છે. રેલવે તંત્ર દ્વારા એક QR કોડ પણ જાહેર કરવામાં આવ્યો છે, જેને સ્કેન કરવાથી કઇ ટ્રેન કયા સ્ટેશનથી, ક્યારે અને કયા સમયે ઉપડશે તેની માહિતી મળશે.
8 જાન્યુઆરીથી સુરત પ્લેટફોર્મ-2 પર સ્ટોપ કરતી અપ લાઇનની 122 એક્સપ્રેસ ટ્રેનો અને સુરત પ્લેટફોર્મ-1 પર સ્ટોપ કરતી ડાઉન લાઇનની 79 ટ્રેનોને 8 જાન્યુઆરીથી ઉધના ખસેડવામાં આવી છે. જ્યારે રાજધાની, વંદે ભારત, શતાબ્દી, તેજસ, પશ્ચિમ, સૂર્યનગરી, અવધ જેવી પ્રીમિયમ ટ્રેનો સહિત 62 ટ્રેનો માત્ર સુરત સ્ટેશનના પ્લેટફોર્મ 1 અને 4 પરથી દોડશે. રેલવેના આ નિર્ણયને કારણે ઉધના રેલવે સ્ટેશન પર ભારણ વધશે. જેના કારણે મુસાફરોને સ્ટેશનની બહાર ટ્રાફિક સમસ્યાનો સામનો કરવો પડી શકે છે. રેલવે તંત્ર તેને સરળ બનાવવા પ્રયાસ કરી રહ્યું છે.
મંગળવારે રાત્રે 12 વાગ્યાથી સુરત રેલવે સ્ટેશનના પ્લેટફોર્મ-2 અને 3ને બંધ કરવામાં આવી રહ્યા છે, જેના કારણે હવે 201 ટ્રેનો સુરતના બદલે ઉધના રેલવે સ્ટેશન પર ઉભી રહેશે. આ ફેરફારથી મુસાફરીમાં ઘણો બદલાવ આવશે અને ઉધના રેલવે સ્ટેશન પર મુસાફરોની સંખ્યામાં વધારો થશે. અત્યાર સુધી ઉધના રેલવે સ્ટેશન પર અંદાજે 30 થી 35 ટ્રેનો ઉભી રહેતી હતી. જેથી દરરોજ ચાર હજાર મુસાફરો મુસાફરી કરતા હતા. પરંતુ સુરત રેલવે સ્ટેશનના રિડેવલપમેન્ટના કામ દરમિયાન ઉધનાથી 200થી વધુ ટ્રેનો ઉપડશે. આવી સ્થિતિમાં ઉધના રેલ્વે સ્ટેશન પર દરરોજ અંદાજે 75 હજાર મુસાફરો મુસાફરી કરે તેવી સંભાવના છે.
મુસાફરોને અસુવિધા ન થાય તે માટે અને પુનઃવિકાસ કાર્ય દરમિયાન મુસાફરો સ્ટેશનો અને પ્લેટફોર્મ વિશે મૂંઝવણમાં ન આવે તે સુનિશ્ચિત કરવા માટે, ટિકિટ બુકિંગ દરમિયાન આપવામાં આવેલા મોબાઇલ નંબર પર એક SMS મોકલવામાં આવશે. જેના દ્વારા મુસાફરોને મુસાફરીની તમામ માહિતી મળશે. QR કોડ પણ ઇન્સ્ટોલ કરવામાં આવશે. સ્કેન થતાં જ તમામ માહિતી મોબાઈલ પર આવી જશે.
ઉધના રેલવે સ્ટેશન પર આ વ્યવસ્થા જોવા મળશે.
1. સુરત અને ઉધના સ્ટેશન પર લગભગ 150 RPF, GRPF અને અન્ય કર્મચારીઓ.
2. અત્યાર સુધી ઉધના સ્ટેશન પર 5 ટિકિટ બારી હતી. હવે પ્લેટફોર્મ નંબર 6 પર 7 ટિકિટ કાઉન્ટર, પાર્કિંગ વિસ્તારની નજીક 3 ટિકિટ કાઉન્ટર ખોલવામાં આવ્યા છે.
3. પાર્કિંગ અને હોલ્ડિંગ વિસ્તારો પૂર્વ અને પશ્ચિમ દિશામાં મૂકવામાં આવ્યા હતા.
4. લાઈટ, પીવાનું પાણી, શૌચાલય જેવી સુવિધાઓ
5. 50 જેટલા લાઇસન્સ ધરાવતા કુલીઓને સુરતથી ઉધના સ્ટેશન પર ખસેડવામાં આવશે.
6. પ્લેટફોર્મ નંબર 6 પર 10 ખાદ્ય વિક્રેતાઓને પરવાનગી
7. સ્ટેશનની બહારની પરિસ્થિતિ વિશે સુરત ટ્રાફિક અને સિટી પોલીસ તેમજ GRP સાથે વાત કરી.
8. સિટી બસો અને રિક્ષાઓમાં મુસાફરોની સ્ટેશન-ટુ-સ્ટેશન અવરજવરની વ્યવસ્થા.
અગાઉ ગયા વર્ષે જૂનમાં સુરત સ્ટેશનનું પ્લેટફોર્મ ચાર બંધ કરવામાં આવ્યું હતું, જે દરમિયાન કોન્કોર્સના બાંધકામ માટે 19 સંપૂર્ણ થાંભલા અને પાયા બનાવવામાં આવ્યા હતા. તાપ્તી ગંગા સહિત 17 ટ્રેનો ખસેડવામાં આવી છે અને હવે કામને આગળ વધારવા માટે પ્લેટફોર્મ 2 અને 3 પર પાયાના સ્તંભો પણ ઉભા કરવામાં આવશે. સુરત રેલ્વે સ્ટેશન પર 60 દિવસમાં COP ફાઉન્ડેશન, રૂફ ફાઉન્ડેશન, લિફ્ટ અને બીમ લગાવવાની કામગીરી કરવામાં આવશે.